2023: PASABLE BONA YARO EN LA IDO-LITERATURO

Kovrili dil 16 Ido-libri aparinta en 2023.

Dum la tota yaro 2023 aparis la sequanta Ido-libri o -broshuri:

 

Drake, Brian (trad.): Leigh Brackett: Nigra Amazono di Marso. Tradukita da Brian E. Drake. Oxford, NY: The Oxford Rationalist, 2023. 133 p. (pdf-edituro)

Drake, Brian (trad.): Jason Colavito: Hororo e cienco. Esayi pri la hororo-jenro, skeptikismo, e Scientology. Tradukita da Brian E. Drake. Oxford, NY: The Oxford Rationalist, 2023. 76 p. (pdf-edituro)

Drake, Brian (trad.): Jason Colavito: Frauda lanfelo. Mentiado pri Atlantida, exterterani, ed Argonauti en Greka mitologio. Tradukita da Brian E. Drake. Oxford, NY: The Oxford Rationalist, 2023. 63 p. (pdf-edituro)

Drake, Brian (trad.): Jason Colavito: La Origini di la spaco-dei. Anciena astronauti e la Cthulhu-mitaro faktive e fiktive Tradukita da Brian E. Drake. Oxford, NY: The Oxford Rationalist, 2023. 47 p. (pdf-edituro)

Drake, Brian (trad.): Jason Colavito: Anciena bombi atomala. Fakti, fraudo, e la mito pri prehistoriala milito nukleala Tradukita da Brian E. Drake. Oxford, NY: The Oxford Rationalist, 2023. 59 p. (pdf-edituro)

Drake, Brian (trad.): Jason Colavito: Misterii di anciena Nord-Amerika. Explorar viziti da Afrikani, Aziani, ed Europani a la nova mondo prehistoriala. Tradukita da Brian E. Drake. Oxford, NY: The Oxford Rationalist, 2023. 95 p. (pdf-edituro)

Drake, Brian (trad.): Ward M. Stevens (Paul S. Powers): Sonny Tabor esas kaptita inter la duopligata tondro di justa pafili e neyusta pafisti. Tradukita da Brian E. Drake. Oxford, NY: The Oxford Rationalist, 2022. 90 p. (pdf-edituro)

Drake, Brian (trad.): Beatrix Potter: La Historio di Petro-Kuniklo.Tradukita da Brian E. Drake. Oxford, NY: The Oxford Rationalist, 2022. 57 p. (pdf-edituro)

Drake, Brian (trad.): Beatrix Potter: La Historio di Benjamin-Kunikleto.Tradukita da Brian E. Drake. Oxford, NY: The Oxford Rationalist, 2022. 57 p. (pdf-edituro)

Drake, Brian (trad.): Beatrix Potter: La Historio di Jemima Flak-anado.Tradukita da Brian E. Drake. Oxford, NY: The Oxford Rationalist, 2022. 55 p. (pdf-edituro)

Drake, Brian (trad.): Beatrix Potter: La Historio di du mala musi. Tradukita da Brian E. Drake. Oxford, NY: The Oxford Rationalist, 2022. 57 p. (pdf-edituro)

López Rubio, José Miguel (trad.) Gramática completa detallada de lengua internacional Ido: Kompleta Gramatiko Detaloza di la linguo internaciona Ido. Tradukita da / Traducido por José Miguel López Rubio. 2023. 209 p.

Neves, Gonçalo: Anke lu darfas. Kin erotika rakonti en Ido, decoze ilustrita, kun prefaco (“Ido ed erotikismo”) da Abelardo Moro e glosario da Nuno Lemos. Espinho: Editerio Sudo, 2023. 65 p. (pdf-edituro)

Neves, Gonçalo: Plu mult aero! Kolekturo de 35 original Ido-poemi modesta (forsan ne la maxim mala da ica autoro), kun prefaco e mikra glosario da Nuno Lemos. Espinho: Editerio Sudo, 2023. 68 p. (pdf-edituro)

Partaka (trad.): Khalil Gibran: Ila Profeto. Tradukita da Partaka. Unesma libra edituro. Espinho: Editerio Sudo, 2023. 75 p. (pdf-edituro)

Schlemminger, Günter (trad.): Gerhart Hauptmann: Voyo-gardisto Thiel. Bahnwärter Thiel. Bilingua edituro. Tradukuro: Günter Schlemminger. Berlin: Germana Ido-Societo, 2023. 80 p. (Ido-lektajo, kayero 9.)

Yen kelka statistikal datumi pri la supera listo (inter parentezi, por komparo, aparas la korespondanta datumo de 2022):

Nombro de libri publikigita: 16 (13)

Nombro de verki originala: 3 (6)

Nombro de verki tradukita: 13 (7)

Nombro de autori / tradukinti: 5 (6)

Nombro de libri / broshuri papera: 1 (1)

Nombro de pdf-libri / -broshuri: 15 (12)

Distributo autorala: Drake: 11 (7) verki; Neves: 2 (2); López Rubio: 1 (0); Partaka: 1 (1), Schlemminger: 1 (1).

Fonto-lingui dil tradukuri: Angla: 11 (5), Germana: 1 (1), Hispana: 1 (0).

Nombro de pagini: entote 1.286 (2.524)

Meza nombro de pagini di singla verko: 80 (194)

Pos tri intersequanta yari tre fruktoza (24, 34 e 22 verki en 2020, 2019 e 2018, rispektive), pasable magra yaro en 2021 (nur 9 verki), promisanta yaro en 2022 (13 verki), 2023 semblas esar pasable bona yaro segun la nombro de verki aparinta (16), ma la meza nombro de pagini di singla verko multe diminutis kompare al antea yaro, la nombro de autori/tradukinti duras ne kreskar (do, preske sempre la sama homi skriptas e publikigas) e la nombro de papera libri duras esar tro mikra, same kam la nombro de fonto-lingui dil tradukuri, kun tro granda prepondero dil Angla.

 

Statistikala datumi pri omna Ido-verki aparinta en la periodo 2018–2023

Nun me duros prizentar la statistikala datumi pri la ensemblo de yari de kande me komencis sistematre revuar la literaturo di Ido (2018), nam to forsan interesos nia samideani, montrante tendenci pri bona o mala developeso.

Nombro de libri publikigita: 118

Nombro de verki originala: 51

Nombro de verki tradukita: 67

Nombro de libri / broshuri papera: 13

Nombro de pdf-libri / -broshuri: 105

Nombro de pagini: entote 12.184

Meza nombro de pagini di singla verko: 103

Nombro de autori/tradukinti: 21 (inter qui 6 esas mortinta)

Distributo autorala: Drake (59 verki!!), Madonna (16), Neves (16), Carlevaro (5), Partaka (4), Schlemminger (4), Sa (3), Morin (2), Stuifbergen (2), Beaufront (1), Chandler (1), Cossío Ramírez (1), Haupenthal (1), Jacob, M. (1), Juste (1), Kasper, M. (1), López Rúbio (1), Pascau (1), Pontnau (1), Schmidtchen (1), Weston (1).

Fonto-lingui dil tradukuri: Angla (49 verki), Germana (9), Franca (5), Portugalana (2), Esperanto (1), Greka antiqua (1), Hispana (1), Latina (1), Valenciana (1). [9 lingui entote]

 

Nu, omna-kaze, existas nun multa Ido-libri lektebla e mem lektinda, por omna gusti e tendenci. On do sequez la konsilo da Juste, qua yene kronizis la prefaco di La Serchado:

“Agez kom bon lektero : do vu lektez...”