Ja de 2019 me revuas, kompilas ed
enlistigas omna aparinta Ido-verki, sive originala, sive tradukita, e prizentas
ta listi en ica blogo. Nun esas facile konsultebla ta listi por la yari 2018, 2019, 2020, 2021, 2022, 2023 e 2024. La
listi kontenas anke la ligili di omna enretigita verki, quo posibligas direta e
rapida aceso da irga interesato. Pluse, la bibliografiala indiki di omna
Ido-verki publikigita de 1907 til julio di 2020 aparas en la triesma edituro di
Bibliografio di Ido, redaktita da Tazio Carlevaro, Reinhard Haupenthal,
Tiberio Madonna e me ipsa.
Tamen, malgre omna ta longa listi e
datumi, e malgre ta dika bibliografio (317 A4-pagini!), sempre semblis a me ke
mankas plu kurta listo, facile acesebla e konsultebla, kontenanta nur la indiki
pri Ido-verki rekomendinda, do listo simila od analoga al Esperantala baza legolisto, quan William Auld kompilis en 1988 ed aktualigis en
1997, e quan pose (en 2023) kompletigis Sten Johansson (la prozala parto) e Nicola Ruggiero e Suso Moinhos (la poeziala
parto).
Yen do mea listo, qua forsan povos
helpar ed orientizar la amanti di Ido-literaturo:
PROZO
Cossío Ramírez, José: La aventuri dil Amazonia. Unesma kontakto. Mexikia: Editerio Ido Sonora, 2008. 122 p. (pdf-edituro)
Cossío Ramíre, José: La aventuri dil Amazonia II. Gravito zero. Mexikia: Editerio Ido Sonora, 2008.
336 p. (pdf-edituro)
Cossío Ramírez, José: Khristine. Editerio Ido Sonora, 2019. 40 p.
(pdf-edituro)
Costalago, Vicente: La predicajo
di Hakum. 2024. 28 p. (pdf-edituro)
Drake, Brian: Nokto-gardeno. Noveli. Duesma edituro, emendita. Oxford, NY:
The Oxford Rationalist, 2018.
92 p. (pdf-edituro) [1-ma edituro (papera): 2012]
Drake, Brian: La aboyanta lando. Farso politikal. Romano. Oxford, NY: The Oxford Rationalist, 2018. 329 p. (pdf-edituro) [revizita e korektigita versiono di Sencesa
bruiso, 2014]
Drake, Brian E.: Pagini trovita en fango. Noveli. Oxford,
NY: The Oxford Rationalist, 2018. 124 p. (pdf-edituro)
Drake, Brian E.: Kurez, kurez, ocidero. Romano. Oxford, NY: The Oxford Rationalist,
2019. 139 p. (pdf-edituro)
Drake, Brian E.: Sen kordeti. Romano. Oxford, NY: The Oxford Rationalist, 2019. 151 p. (pdf-edituro)
Filareto Kavernido (pseudonimo
di Heinrich Goldberg): La Raupo. Originala fabulo. Berlin-Charlottenburg: Ido-Centrale (Hermann Jacob),
1926. 12 p.
Kofman, Abraham: La libro pri Esther. 2-ma edituro.
Ponferrada: Editerio Krayono, 2004. 16 p. (pdf-edituro) [1-ma edituro:
1925]
Madonna,
Tiberio: Fantastikaji. Kolekturo pelmela de fantaziaji en linguo Ido,
kun fabli, rakonti, espritaji e limericks. Caserta: autoro, 2012. 60 p.
Madonna, Tiberio: La saponbulo. Fablo. 2-ma edituro. Autoro, 2018. 16 p. (pdf-edituro) [1-ma
edituro: 2017]
Madonna, Tiberio: L’asasino di Gonçalo. Detektivo-romaneto
di cienco-fiktivajo. Italia: Editerio La Plumo, 2018. 106 p. (pdf-edituro) [2-ma edituro (papera):
2019]
Madonna, Tiberio: L’arboro
dil cielo. 2-ma edituro. Italia: Editerio La Plumo, 2019. 24 p. (pdf-edituro) [1-ma edituro: 2018]
Madonna, Tiberio: La libro raptera. Rakonto. 2-ma edituro. Italia: Editerio La Plumo, 2019. 69 p. (pdf-edituro) [1-ma edituro: 2014]
Madonna, Tiberio: La
sonjo furtita. Rakonto. 2-ma
edituro. Italia: Editrio La Plumo, 2019. 24 p. (pdf-edituro) [1-ma edituro: 2018]
Madonna, Tiberio: La formiko redkapa. 2-ma edituro. Editerio La Plumo, Italia, 2019. 14 p.
(pdf-edituro) [1-ma edituro: 2011]
Madonna,
Tiberio: La dolca oldineto. Editerio La Plumo, Italia, 2019. 6 p. (pdf-edituro).
Madonna,
Tiberio: La mikra punto. 2-ma edituro. Editerio La Plumo, Italia, 2019. 14
pagini. (pdf-edituro) [1-ma edituro: 2013]
Madonna,
Tiberio: La mikra punto 2.
Editerio La Plumo, Italia, 2019. 10 p. (pdf-edituro)
Neves, Gonçalo: Lo mikra es bel.
Esayeto pri la esenco di Ido. Tradukita al: Angla
(Robert Carnaghan), Franca (Jean Martignon), Germana (Hermann Philipps),
Hispana (Eduardo Rodi), Italiana (Fernando Zangoni), Rusa (Igor Vinogradov),
Portugalana (Nuno Lemos), Valenciana (Partaka), Finlandana (Arto Moisio). 2-ma
edituro. Espinho: Editerio Sudo, 2019. 47 p. (pdf-edituro) [1-ma edituro
(papera): 2007]
Neves, Gonçalo: Anke lu darfas. Kin erotika rakonti en Ido, decoze ilustrita, kun
prefaco (“Ido ed erotikismo”) da Abelardo Moro e glosario da Nuno Lemos.
Espinho: Editerio Sudo, 2023. 65 p. (pdf-edituro)
Partaka: Habemus LIA. Original Ido-verko cienco-fiktiva. Barcelona: autoro, 2010. 159 p.
(pdf-edituro)
Partaka: Evangelio segun Partakael. Barcelona: autoro, 2014. 72 p. (pdf-edituro)
Partaka: Anekdoti ed enigmati. Kolekturo
de 56 original anekdoti e plusa explikanta texto, kun prefaco da Gonçalo Neves.
Espinho: Editerio Sudo, 2021. 118 p. (pdf-edituro)
Partaka:
Somito-renkontro kun Deo. Original
Ido-verko. Barcelona: autoro, 2022. 57 p. (pdf-edituro)
Rodi, Eduardo A.: La sucedanto. Ponferrada: Editerio Krayono, 2005. 53 p. (pdf-edituro)
Rodi, Eduardo A.: Narkotanti. Arjentinia: Editerio Krayono, 2007. 143 p. (pdf-edituro)
Romanin, G.
T. (pseudonimo di Jean Martignon):
La suno di Tiahuanako. 2-ma edituro. Ponferrada: Editerio Krayono, 2004.
10 p. (pdf-edituro) [1-ma edituro (papera): 1999, 15 p.]
Romanin, G.
T. (pseudonimo di Jean Martignon):
Skandalo en Roseringen.
Ponferrada: Editerio Krayono, 2005. 11 p. (Nova Ido-literaturo)
(pdf-edituro) [papera edituro, sam-data, 29 p.]
Sa, Herder: Che la linguiferio. Kolekturo de 16 original Ido-rakonti, kun prefaco da Gonçalo
Neves. Espinho: Editerio Sudo, 2021. 148 p. (pdf-edituro)
Vinez, Henri:
Mea voyajo a Tahiti e Mondo-Turo. Tällberg: Sueda Ido-Federuro, 1956. 46
p.
POEZIO
Drake, Brian E.: Astoneso. Poemaro. Oxford, NY: The Oxford
Rationalist, 2018. 39 p. (pdf-edituro)
Drake, Brian E.: Tu. Poemo-serio. Oxford, NY: The Oxford Rationalist,
2020. 30 p. (pdf-edituro)
Drake, Brian: La viro de la nivo. Oxford, NY: The Oxford Rationalist,
2022. 102 p. (pdf-edituro)
Exterius
(pseudonimo di Andreas Juste):
Epigrami.
/Gilly/: Gislero, 1993. 36 p.
Juste, Andreas: Soneti. Originale kompozit en Idolinguo.
Hoting: Sueda Ido-Federuro, 1963: 22 p.
Juste, Andreas: A Couturat. Odo por l’aniversario di lua morto, 1914-1964. Originale kompozit
en Idolinguo da A.J. Zürich: Buchdruckerei Berichtaus, 1966. 20 p.
Juste, Andreas: La
serchado. Poemo hero-komika en dek kanti.
Originale kompozit en Idolinguo. Gilly: autoro, 1972. ix + 178 p.
Juste, Andreas: La fabli dil Olda Korvo.
/Zürich: ed. dal autoro e da damzelo Bosshard/, 1973. 34 p.
Juste, Andreas: Vitra perli.
Originale kompozit en Idolinguo. /Gilly: autoro, 1978/. iv + 59 p.
Juste, Andreas: Fabli di la pigo.
Ilustrita da Miryam Juste. /Gilly/: autoro, 1983. 68 p.
Juste, Andreas: Nova fabli.
Gilly: autoro, 1983, 55 p.
Juste, Andreas: La jaro. Kontenanta
dek epistoli e kin satiri. /Gilly: autoro, 1984. 18 + 154 + 84 p.
Juste, Andreas: Ultima Versi: La Renkontro; Dici di
pilgrimero; Adial poemo. s.l. /1985/. 92 p.
Juste, Andreas: L'amforo. Poemi originale kompozit en
Idolinguo 1962-1987. /Gilly: autoro, 1987/. 236 p.
Juste, Andreas: Petri an voyo. Originale kompozit en
Idolinguo da Andreas Juste. s.l., s.d. 32 p.
Madonna,
Tiberio, Guti
de ombro e guti de lumo. Poemi en Ido. Caserta: autoro, 2010. 60 p.
Madonna,
Tiberio: Pensi. Poemi en linguo Ido. Kun prefaco da Ferdinand Möller.
Caserta: autoro, 2011. 56 p.
Madonna,
Tiberio: La tri suni. Poemi en Ido. Caserta: autoro, 2012. 56 p.
Madonna,
Tiberio: La sonji. Poemi en linguo Ido. Caserta:a autoro. 2014. 56 p.
Neves, Gonçalo: Dazlo. Originala poemaro en Ido. 3-ma edituro, revizita,
notizita ed ilustrita. Espinho: Editerio Sudo, 2019. 41 p. (pdf-edituro)
[1-ma edituro: 2002]
Neves, Gonçalo: Itere.
Kolekturo de 18 original Ido-poemi senpretenda (qui povus
esar mem plu mala), kun prefaco da Nuno Lemos. Espinho: Editerio Sudo, 2020. 38 p. (pdf-edituro)
Neves, Gonçalo: Plu mult aero! Kolekturo de 35 original Ido-poemi modesta (forsan ne la
maxim mala da ica autoro), kun prefaco e mikra glosario da Nuno Lemos. Espinho:
Editerio Sudo, 2023. 68 p. (pdf-edituro)
Neves, Gonçalo: Skopo nula. 30
haikuatra poemi originala. Espinho: Editerio Sudo, 2024. 32 p.
(pdf-edituro).
Neves, Gonçalo: Blu inspiro. 9
originala poemi ek katenizita haikuatri kontenanta entote 525 versi pri Ido ed
Ido-skriptado. Espinho: Editerio Sudo, 2025. 54 p. (pdf-edituro)
Partaka: Poemeti
haikua e haikuatra. Barcelona: autoro, 2025 116 p. (pdf-edituro)
Sa, Herder: Spegulo
qua reverberas sun-levi. Kolekturo de 21 original Ido-poemi,
kun prefaco da Gonçalo Neves. Espinho:
Editerio Sudo, 2021. 80 p. (pdf-edituro)
Sweetlove, Tom: Probo-flugi sur Pegazo. Poemi en Ido da T.S. Southend-on-Sea: autoro, 1929. 90
p.
TEATRO
Drake, Brian:
La Krulo di la domo di le Usher. Dramato por aktori o marioneti de la rakonto da Edgar
Allan Poe. Oxford, NY: The Oxford Rationalist, 2018. 15 p. (pdf-edituro)
Drake, Brian E.: La fantomo
vivanta. Dramato en verso. Oxford, NY: The Oxford Rationalist, 2019. 23 p.
(pdf-edituro)
Drake, Brian E.: La kano-tranchero. Dramato en verso. Oxford,
NY: The Oxford Rationalist, 2019. 43 p. (pdf-edituro)
Drake, Brian E.: La Odiinda
Komedio di Karnobrises Testosteronides; od, universo bone futuita. Obcenajo
teatral en kin akti. Oxford, NY: The Oxford Rationalist, 2019. 33 p.
(pdf-edituro)
Gross, Jules: La
kato botizita. Rakonta komedio por la mikri pri la L.I. Budapest: Uniono
katolik idista, 1922. 19 p.
Gross, Jules: Robinson Krusoe. Unakta komedio por la
pueri. Kecskémet: Hungaria, 1922. 16 p.
Generala konsideri pri la kriterii dil kompilinto
La listo kontenas nur Ido-verki originala aparinta kom libri o broshuri –
papera od elektronikala – kun numerizita pagini. Ol do ne inkluzas rakonti,
poemi e altra texti aparinta en revui,
jurnali, blogi, edc, mem se li havas bona qualeso.
La listo kompilesis segun mea literaturala preferi. Ol do esas listo nur privata
e personala, nule “oficala” od “institucala”. Altra homi probable kompilus
altra listi.
La listo inkluzas nur verki quin me povis ipse acesar ed evaluar, kun nur quar
ecepti: Sonji e Fantastikaji, da Madonna, e Nova fabli e La
blanka flor’, da Juste: en ica kazi, me judikis kom suficanta la
qualeso-historio dil du autori. Pro ta kriterio, la listo ne kontenas certena
verki quin me forsan selektabus, se me povabus acesar li.
La listo kontenas anke verki da me ipsa. Me do demandas pardono de la
lekteri pro mea manko di modesteso. Mea sola exkuzo esas ke anke Auld e Johansson agis lo sama kande ili kompilis la Esperanto-listi
supere mencionita...
La prozo-fako kontenas ne nur verki fiktiva, ma anke kroniki, anekdoti ed
esayi, ma ol inkluzas nek biografii nek verki gramatika o traktanta gramatikala
questioni.
Statistikala datumi pri la listo
La listo kontenas entote 66 verki en tri faki; Prozo (33 verki), Poezio
(27) e Teatro (6).
Ol kontenas verki da 15 autori de 12 landi – Francia (2 autori), Hispania
(2), Arjentinia, Brazil, Germania, Italia, Mexikia, Portugal, Rusia, Suisia,
Unionita Rejio, Usa – reprezentanta nur 2 kontinenti: Europa (11 autori) ed
Amerika (4).
Distributo autorala segun la nombro de verki: Madonna (14 verki), Drake
(12), Juste (12), Neves (7), Partaka (5), Cossío (3), Martignon (2), Gross (2),
Rodi (2), Sa (2), Costalago (1), Goldberg (1), Kofman (1), Sweetlove (1), Vinez
(1).
Distributo autorala segun la nombro de pagini: Drake (1120 pagini), Juste
(1092), Madonna (561), Partaka (522), Cossío (498), Neves (345), Sa (228), Rodi
(196), Sweetlove (90), Vinez (46), Martignon (44), Gross (35), Costalago (28),
Kofman (16), Goldberg (12).
Nombro de pagini di omna verki entote: 4833.
Komparo inter ca listo e la Esperanto-listi
La listo da Auld kontenas entote 59 Esperanto-verki, en nur du faki: Prozo
(32) e Poezio (27). Do ol esas tre simila a mea listo segun la nombro de verki
en ta du faki, ma ol prizentas anke du importanta diferi: la prozo-fako
kontenas nur verki fiktiva, e la prozo-verki generale esas plu paginoza;
exemple, Auld inkluzis rakontari, ma ne aparta rakonti aparinta kom (tre) dina
broshuri, kontre ke me inkluzis anke olci. To konsequas de ke, en Esperantia,
on ordinare ne publikigas tala tre dina broshuri, precipue kande li esas
papera. Pluse, en Esperanto aparas ordinare plu multa verki kam en Ido, do mem
sat detaloza Esperanto-listo ne necese inkluzos omna valoroza e lektinda verki,
e fakte existas multa tala verki qui ne inkluzesis en la listo da Auld e mem ne
en olta da Johansson, Ruggiero e Moinhos, qui adjuntis
30 verki (14 en Prozo e 16 en Poezio) al listo da Auld. Kontree, mea listo
inkluzas preske omna valoroza e lektinda Ido-verki en la definita faki – segun
mea kriterii, evidente.
Fine, me dicez ke, del 66 Ido-verki enlistigita, 49 (do, 74%!)
esas libere, gratuite e facile acesebla en la reto. To facas granda – e mem
shokiva – kontrasto kun la situaciono en Esperantia, ube ankore regnas multa
interesti partikulara, editeral ed institucala, ed ube nur pekuniozi darfas
acesar omna verki quin li volas evaluar o juar. Koncerne ta aspekto – e ne nur
ta... – Idia esas plu apertita, plu equitatoza, plu yusta e plu demokratiema
kam Esperantia, ed espereble ni omna agos lo posibla por mantenar ol tala.
